كشف الكاتب الصحفي هاني يونس ، المستشار الإعلامي لرئيس مجلس الوزراء، أن الابتلاء هو من عند الله، مؤكدا أن الله أعطاه ما لا يتخيله وما لم يكن يحلم به أبدا، قائلا: «عملت في وظائف كثيرة من أجل أن أكون نفسي إلى أن أتى لي عرض أن أكون مستشار إعلامي لوزير الإسكان».
ربنا زي ما بيبتلي بيجبر
وأضاف هاني يونس، خلال حواره في برنامج «كلم ربنا» مع الكاتب الصحفي أحمد الخطيب رئيس مركز أخباراليوم للدراسات الإستراتيجية المذاع عبر الراديو 9090: «عايز أقول للناس إن ربنا زي ما بيبتلي بيجبر، ربنا جبرني في كل حاجة، واداني اللي عمري ما كنت أتخيله أو أحلم بيه، فأنا ابن موظف بسيط، كان حلمي من وأنا صغير إني أبقى صحفي في الأهرام، واشتغلت وظائف كتيرة عشان أكوّن نفسي، لحد ما جالي عرض إني أشتغل مستشار إعلامي لوزير الإسكان، ورفضت وقتها عرض في السعودية لأني أكره الغربة وأيضًا بسبب مرض والدي، و اشتغلت في وزارة الإسكان، واستمرت رحلتي مع 6 وزراء إسكان، منهم 2 أصبحا رؤساء وزراء،
وأضاف: أنا بقول كده عشان أوصل رسالة للناس إن ربنا عمره ما بيسيب حد بيجتهد، وبقول للشباب الصغيرين: اجتهدوا جدًا، وربنا هيجبركم.
بشكر ربنا إنه دايما بيفتكرني
وأضاف: «بقول لربنا شكرا حتى على الابتلاء رغم إنه مؤلم بشكره إنه بيفتكرني حتى بالابتلاء، وبشكره إنه جبرني بعده، وبناتي الـ 4 هما حياتي كلها، هما سعادتي ورزقي وابتلائي وجبري، والناس بتفتكر إن اللي فى وضع المسئولية معندوش أزمة ولا اختبار ولا ابتلاء، وانهم عايشين في رغد من العيش ومفيش أى مجهود».
و قال الكاتب الصحفي هاني يونس، المستشار الإعلامي لرئيس مجلس الوزراء: «ربنا عمري ما روحتله مكسور إلا وجبرني، كلنا بنتعرض لمواقف شخصية ومهنية، وأنا انكسرت كتير، ولما الطرق بتتقفل بينا ومش بنلاقي حل، بنرجع لباب ربنا، الباب اللي عمره ما بيتقفل»، مضيفا:« أنا بكلم ربنا كتير، وعمري ما خذلني».
لاحظت حاجة غريبة في رجل بنتي
وأضاف «هاني يونس» خلال حواره في برنامج «كلم ربنا» المذاع عبر الراديو 9090: «عندي أربع بنات، والتانية منهم اسمها هايا، بعد الولادة بأيام لاحظت حاجة غريبة في رجلها، وروحت لدكتور اللي صدمني بكلامه وقال: «دي عندها عيب خلقي، وممكن نوصل في مرحلة للبتر وهي لسه طفلة رضيعة، فنزلت من عنده وأنا منهار، وببكي ومش قادر أسوق العربية، ومش بقول غير يا رب».
واستطرد هاني يونس: «وقتها عرفت إن في علاج بألمانيا، وبدأت أرتب نفسي، لكن بالصدفة لقيت خبر عن رئيس جمعية جراحي العظام، ولقيته متخصص في الحالة دي، وروحت له وشرح لي خطة العلاج وقال: هنعمل 4 أو5 عمليات لحد ما توصل 15 سنة كويسة، فلقيتني بكلم ربنا وأتحايل عليه وأترجاه، وأقوله: (يا رب متبتلنيش في بناتي، ابتلائي وجبري وثروتي في بناتي)».
ابنته الكبرى تعرضت لحادث اختناق غاز
وأشار هاني يونس إلى أن ابنته الكبرى تعرضت لحادث اختناق غاز في الحمام، مضيفًا: «لقيت زوجتي بتقول إن البنت مبتردش، فضلت أخبط وأنا مهدود ومرهق لغاية ما كسرت باب الحمام، لقيتها مغمى عليها، خدناها على المستشفى وأنا روحي رايحة، فضلت واقف جنبها لحد ما فاقت، وأنا في اللحظة دي اتشهدت من الفرحة، حسيت إن روحي رجعت لي تاني، والحمد لله ربنا جبرني، وده فضل من ربنا».
كما كشف «هاني يونس» عن معاناة ابنته «عالية»، إحدى التوأم، التي شك الأطباء في إصابتها بضمور في المخ، لكنه واصل رحلة العلاج الطبيعي والدعاء، ووقتها ذهب للحج ودعا الله، وبعد عودته بأسبوع تمكنت من المشي وحققت تفوقًا دراسيًا، قائلاً: «كنت دايمًا أقول لربنا: ما تخذلنيش في ولادي، والحمد لله ربنا ابتلاني وجبرني، ومشيت وبقت متفوقة»، متابعا: «ربنا أكرمني وجبرني فيهم كلهم، وحكمة الابتلاء هي أنه يختبر صبرك، ويديك عشان يشوف هتشكر ولا لأ».
واستكمل: «أنا لأول مرة بحكي الكلام ده، ولسه كنت بكلم صديق لقيته زعلان جدًا، عنده حد من أسرته هيعمل عملية، والدنيا كانت سودة في عينه، حاولت أهون عليه وأقوله: (هتعدي)، فرد عليا وقال: (اللي إيده في الميه مش زي اللي إيده في النار)، الكلمة وجعتني، لأنه افتكر إني مش في النار، وهو مش عارف أنا مريت بإيه، لكن حكيت له إنه من كام يوم كنت أنا ومراتي على سراير العمليات في نفس المستشفى ونفس اليوم ولوحدنا، هي كان عندها عملية مرارة متأخرة وهتنفجر، وكنا مأجلينها عشان البنت في الثانوية، وأنا كان عندي زائدة في ضهري ومعنديش وقت، دخلنا إحنا الاتنين مع بعض، ومفيش حد معانا، ومحدش عرف خالص، خلصنا وطلعنا ومقولناش لحد غير بعد ما عدت، وقلت له: (مش هقولك باقي الحاجات، غير إنه كله بيعدي وربنا بيجبر، ومفيش حد في الدنيا معندوش ابتلاءات)».
